თბილისი, 20 ივლისი, საქინფორმი. არასამთავრობო ორგანიზაციებმა – „საერთაშორისო გამჭვირვალობა – საქართველომ“, „სამართლიანმა არჩევნებმა“ და „საქართველოს ახალგაზრდა იურისტთა ასოციაციამ“ – ერთობლივი საარჩევნო ინტერნეტპორტალი შექმნეს.

როგორც პრეზენტაციაზე არასამთავრობოების წარმომადგენლებმა განაცხადეს, პორტალის მიზანია 2012 წლის საპარლამენტო არჩევნების შესახებ ყოვლისმომცველი ინფორმაციის გავრცელება.

არასამთავრობო ორგანიზაციებისა და მოქალაქეების მიერ დაფიქსირებული სავარაუდო დარღვევები პორტალზე სპეციალურ რუკაზე განთავსდება. პორტალის მისამართია: www.electionsportal.ge.

არჩევნების პორტალზე საარჩევნო პერიოდის დარღვევებისა და ინციდენტების შესახებ ინფორმაციის განთავსება ნებისმიერ მოქალაქეს შეუძლია. პორტალთან ერთად ამუშავდება უფასო sms-ნომერი 2500, რომელზეც მოქალაქეებს ინფორმაციის გაგზავნა შეეძლებათ.