თბილისი, 18 ივლისი, საქინფორმი. ბიძინა ივანიშვილის ოპოზიციურმა კოალიცია „ქართულმა ოცნებამ“ განაცხადა, რომ ის არ ენდობა „NDI“-ს დაკვეთით ჩატარებულ კვლევას, რომელიც 16 ივლისს გამოქვეყნდა, ხოლო „ნაციონალურმა მოძრაობამ“  განაცხადა, რომ მისი მხარდაჭერა კვლავ მაღალია, იმის მიუხედავად, რომ პარტიას ჯერ საარჩევნო კამპანია ოფიციალურად არ დაუწყია.

ივნისში ჩატარებული კვლევის თანახმად, „ერთიანი ნაციონალური მოძრაობა“ ორჯერ უსწრებს ბიძინა ივანიშვილის ოპოზიციურ კოალიცია „ქართულ ოცნებას“, თუმცა ამ უკანასკნელის რეიტინგი თებერვლის შემდეგ 8 პროცენტული პუნქტით გაიზარდა, ხოლო მმართველი პარტიის – 11 პროცენტული პუნქტით შემცირდა. „ქრისტიან-დემოკრატიულმა მოძრაობამ“, კვლევის თანახმად, მხოლოდ 3% მიიღო – ეს მაჩვენებელი უცვლელი დარჩა თებერვლის შემდეგ.

„ეს კვლევები რომ ნდობას არ იწვევს ჩვენში, ჩვენ ამაზე არაერთხელ განვაცხადეთ, – ამბობს „ქართული ოცნების“ პრესსპიკერი მაია ფანჯიკიძე, – შესაბამისად, ამ ციფრების კომენტირებას მე არ ვაპირებ, იმიტომ, რომ კიდევ ერთხელ შემიძლია გავიმეორო, რომ  ჩვენ არ ვიცით მეთოდოლოგია ამ კვლევების... არ ვიცით, როგორ არის ჩატარებული საველე სამუშაო ა.შ. და ა.შ. ... აქედან გამომდინარე, ჩვენი პოზიცია ამ თემაზე არ შეცვლილა“.

მან, ასევე, განაცხადა, რომ „ქართული ოცნებისთვის“ მთავარი ინდიკატორია ხალხმრავლობა მათი კამპანიის აქციებზე და არა სხვადასხვა კვლევის მონაცემები.

ცნობისათვის: მარტში „ქართულმა ოცნებამ“ წერილი გაუგზავნა აშშ-ის ელჩს საქართველოში, სადაც ეჭვქვეშ დააყენა „NDI“-სა და საერთაშორისო რესპუბლიკური ინსტიტუტის (IRI) დაკვეთით განხორციელებული კვლევები და საპარლამენტო არჩევნებამდე ამგვარი კვლევების განხორციელების შეწყვეტისკენ მოუწოდა. აშშ-ის საელჩოს პასუხი ასეთია: „დარწმუნებულნი ვართ, ეროვნულ-დემოკრატიული ინსტიტუტის .... კვლევები პროფესიულადაა ჩატარებული და ლეგიტიმურ მეთოდოლოგიას ეფუძნება“.

დეპუტატმა მმართველი პარტიიდან გიორგი გაბაშვილმა განაცხადა ორშაბათს, რომ „NDI“- ს კვლევები არის კვალიფიციური და კომპეტენტური და ემთხვევა, ძირითადად, „იმ მონაცემებს, რომლებიც ჩვენ სხვა კვლევების შედეგად გვაქვს“. მან, ასევე, განაცხადა, რომ „მმართველი პარტია მადლობელია თავისი ამომრჩევლის იმიტომ, რომ გვაქვს ძალიან მაღალი მხარდაჭერა ამ პერიოდშიც კი, როცა ჯერ არ დაგვიწყია საარჩევნო კამპანია“.

მართალია, მმართველ პარტიას ჯერ ოფიციალურად არ გამოუცხადებია კამპანიის დაწყების შესახებ, მაგრამ პარტიის ლიდერები და მაღალი რანგის ოფიციალური პირები უკვე თვეებია, კამპანიის სტილის შეხვედრებს მართავენ ამომრჩევლებთან. სამართლიანი არჩევნებისა და დემოკრატიის საერთაშორისო საზოგადოების ანგარიშში ასახული მონაცემებით, მმართველი პარტიის წარმომადგენლებმა ივნისში, სულ ცოტა, 57 ასეთი შეხვედრა გამართეს; „ქართულმა ოცნებამ“ – 105 შეხვედრა; „ახალმა მემარჯვენეებმა“ – 34 და „ქრისტიან-დემოკრატებმა“ – 11.

დეპუტატმა ლევან ვეფხვაძემ „ქრისტიან-დემოკრატიული მოძრაობიდან“ განაცხადა, რომ მისი პარტიის რეიტინგში თებერვლის შემდეგ, ძირითადად, არ არის არანაირი ცვლილება, რადგან კვლევის დროს პარტიას კამპანია ჯერ დაწყებული არ ჰქონდა. პარტიამ ოფიციალურად სარჩევნო კამპანია გასულ კვირას დაიწყო.  ვეფხვაძის თქმით, კვლევამ აჩვენა, რომ „ქდმ“-ს აქვს პოტენციალი, გაზარდოს პარტიის მხარდაჭერა და, სულ ცოტა, 10% მიიღოს საპარლამენტო არჩევნებზე.

„ლეიბორისტულმა პარტიამ“ დაგმო „NDI“-ს დაკვეთით ჩატარებული კვლევა და მას „ამერიკელი კოლონიზატორების“ მორიგი ტყუილი უწოდა.

„NDI“-მ გასულ კვირას საზოგადოებრივი აზრის კვლევის ძირითადი შედეგები წარმოადგინა, რომლის ნაწილიც არის 16 ივლისს გამოქვეყნებული პარტიული რეიტინგები, რომელთაც ამ დრომდე ორგანიზაცია თავად არასოდეს ხდიდა  საჯაროს და მედიისგან დახურულ რეჟიმში აცნობდა პარტიებს, საიდანაც შემდგომში კონტექსტიდან ამოგლეჯილად ხდებოდა ამ მონაცემების პრესაში გაჟონვა. ასეთი პრაქტიკის გამო ორგანიზაცია ხშირად ყოფილა სხვადასხვა ჯგუფის კრიტიკის სამიზნე.

„ჩვენ გვსურდა, რომ მინიმუმამდე შეგვემცირებინა არასწორი ინტერპრეტაციები“, – განაცხადა „NDI“-ს თბილისის ოფისის ხელმძღვანელმა ლუის ნავარომ 16 ივლისს და დასძინა, რომ ამის გამო NDI პოლიტიკური პარტიების რეიტინგებს აქვეყნებს მაქსიმალური გამჭვირვალობისა და მონაცემების გარშემო არსებული კონტექსტის უზრუნველყოფის მიზნით.