თბილისი, 11 ივლისი, საქინფორმი. მთავრობის სხდომაზე მინისტრთა კაბინეტმა დასაქმების სამინისტროს მოქმედების გეგმა დაამტკიცა. როგორც დასაქმების სახელმწიფო მინისტრმა პაატა ტრაპაიძემ განაცხადა, უპირველეს ყოვლისა, დაიწყება სამუშაოს მაძიებელთა სრულყოფილი ბაზის შექმნა. ეს კი ჯანდაცვის სამინისტროსთან ერთად მოხდება. უწყების 6-პუნქტიანი გეგმის მიხედვით, სამუშაოს მაძიებელთა აღრიცხვა მთელი საქართველოს მასშტაბით იწყება.

25 ივლისიდან საქართველოს 25 დიდ ქალაქში დასაქმების აგენტები მივლენ ყველა ოჯახში და შეაგროვებენ ინფორმაციას მუშაობის მსურველთა შესახებ. დასაქმების მსურველებს სოციალური ანკეტების შევსება მოუწევთ. ანკეტის შევსება 15 წლის ასაკის ზევით ყველას შეუძლია. მონაცემები დასაქმების სამინისტროში გადაიგზავნება, რის შემდეგაც სამინისტრო ამ პირებს ტესტირებას ჩაუტარებს. პირველი ტესტირება აგვისტოში იგეგმება.