თბილისი, 11 ივლისი, საქინფორმი. საქართველოს თურქების კონფედერაციის საინფორმაციო დეპარტამენტმა (დეპარტამენტის უფროსი სარა საფიხანი, მარნეული) საქინფორმის რედაქციაში გადმოაგზავნა საქართველოს თურქების კონფედერაციის პრეზიდენტ დაშგინ გიულმამედოვის განცხადება.

„საქართველოს თურქების კონფედერაცია საპარლამენტო არჩევნებში მონაწილეობის შესაძლებლობას  განიხილავს“, – განუცხადა მასობრივი ინფორმაციის საშუალებებს საქართველოს თურქების კონფედერაციის პრეზიდენტმა დაშგინ გიულმამედოვმა. მან აღნიშნა, რომ ამჟამად საქართველოს თურქების კონფედერაციას და მასში შემავალ საზოგადოებრივ-პოლიტიკურ ორგანიზაციებს ბორჩალოს (ქვემო ქართლი), შიდა ქართლის  რეგიონებსა და ქ. თბილისში მრავალი მხარდამჭერი ჰყავთ. „თურქულენოვანი დ მუსლიმანი ელექტორატის მრავალრიცხოვანი ნაწილის სიმპათია ჩვენ მხარეზეა. მეორე მხრივ, აჭარაში, მუსლიმანური ფაქტორის გამოყენებით, შეგვიძლია, შესაბამისი ელექტორატის ხმების მნიშვნელოვანი რაოდენობა მივიღოთ.

ჯერჯერობით სამ ვარიანტს განვიხილავთ. საქართველოს თურქების კონფედერაციას შეუძლია, არჩევნებზე მხარი დაუჭიროს მიხეილ სააკაშვილის მმართველ პარტიას ან ბიძინა ივანიშვილის ოპოზიციურ „ქართულ ოცნებას“. ჯერჯერობით ჩვენ არავის ვემხრობით – იმას დავუჭერთ მხარს, ვინც წარმოგვიდგენს საქართველოს თურქი (აზერბაიჯანელი) მოსახლეობის პრობლემების კარდინალურად გადაჭრის კონცეფციას. ჩვენ ეს ინტერესი გვაქვს.

თუ მმართველი პარტია ასეთ ნაბიჯს გადადგამს, მას დავუჭერთ მხარს. თუ ბიძინა ივანიშვილი წარმოგვიდგენს კონკრეტულ კონცეფციას საქართველოს თურქების (აზერბაიჯანელების) პრობლემების გადასაჭრელად, ვფიქრობ, მის მხარეს ვიქნებით.

მაგრამ ჩვენ განვიხილავთ საპარლამენტო არჩევნებში დამოუკიდებლად მონაწილეობის საკითხსაც. სრულიად რეალურია, რომ შევძლოთ საკუთარი პოლიტიკური ბლოკის შექმნა. თუ ეს გამოვიდა, საქართველოს ისტორიაში პირველად თურქული (აზერბაიჯანული) პოლიტიკური ბლოკი დამოუკიდებლად მიიღებს მონაწილეობას არჩევნებში. ქვეყნის მუსლიმანურ-თურქული ელექტორატის ხმებით საქართველოს პარლამენტში 25-ზე მეტი დეპუტატის არჩევა შეიძლება. თუკი ამ არჩევნებზე ეს არ მოხერხდა, მომავალ არჩევნებზე ამაზე წავალთ. ბულგარეთის თურქების მაგალითი სახეზეა.