თბილისი, 11 ივლისი, საქინფორმი. საქართველოში ოფიციალური ვიზიტით მყოფი ეუთოს გენერალური მდივანი ლამბერტო ზანიერი საქართველოს საგარეო საქმეთა მინისტრ გრიგოლ ვაშაძეს შეხვდა, რის შემდეგაც მხარეებმა ერთობლივი პრესკონფერენცია გამართეს. როგორც გრიგოლ ვაშაძე ამბობს, ეუთო არის ერთადერთი ორგანიზაცია, რომელიც პასუხს აგებს ევროპაში უსაფრთხოებაზე. საქართველო კი, დღემდე იბრძვის რუსეთის მიერ დაბლოკილი სადამკვირვებლო მისიის აღდგენაზე. მისივე თქმით, ეუთო მზად არის, გამოგზავნოს როგორც გრძელვადიანი, ისე მოკლევადიანი დამკვირვებლები ოქტომბრის საპარლამენტო არჩევნებისთვის.

ეუთოს გენერალური მდივანი ლამბერტო ზანიერის განცხადებით, საქართველო ეუთოს საზოგადოების სრულფასოვანი წევრია. ზანიერი ამბობს, რომ ქართულ მხარესთან შეხვედრისას განსახილველ საკითხებს შორის იყოს ჟენევის მოლაპარაკებების ფორმატი. მისი შეფასებით, ეს ერთადერთი ფორმატია, სადაც ყველა დაინტერესებული მხარეა წარმოდგენილი. ამას გარდა, ეუთო რჩება ჟენევის პროცესის ერთგული.

„მნიშვნელოვანია, რომ შევინარჩუნოთ აღნიშნული პროცესი, რომელიც დაგვეხმარება მხარეებს შორის ნდობის მშენებლობაში. ჩვენ ჩავერთვებით კონკრეტული პროექტების განხორციელბაშიც, რომელიც ადამიანთა ცხოვრების დონის ამაღლებაში დაგვეხმარება. საუბარია წყლის პროექტზე, რომელიც სასარგებლო იქნება ადმინისტრაციული საზღვრის ორივე მხარეს მყოფი დაზარალებულებისთვის. ეუთო სრულად იქნება ჩართული საქართველოსთან დაკავშირებულ პროექტებში. ვაანალიზებთ, რომ ეუთოს დასწრების აღდგენა საქართველოს ტერიტორიაზე აუცილებელია“, – ამბობს ზანიერი.

ეუთოს გენერალური მდივანი  დადებითად აფასებს საქართველოს ხელისუფლების შეთავაზებას – ქვეყანაში საპარლამენტო არჩევნებისთვის ჩამოვიდნენ საერთაშორისო დამკვირვებლები.  ეუთოს გრძელვადიანი სადამკვირვებლო ჯგუფი 28-კაციანი შემადგენლობით იქნება წარმოდგენილი და საქართველოში არჩევნებამდე ექვსი კვირით ადრე ჩამოვა,  მოკლევადიან სადამკვირვებლო მისიაში 350 ადამიანი გაერთიანდება. ისინი არჩევნებამდე ერთი კვირით ადრე ჩამოვლენ და  არჩევნების დღეს ხმის მიცემასა და ხმების დათვლას დააკვირდებიან.