თბილისი, 5 ივლისი, საქინფორმი. პარლამენტმა 102 ხმით 7-ის წინააღმდეგ განახლებული მთავრობა პრემიერ-მინისტრ ვანო მერაბიშვილის ხელმძღვანელობით და მისი ახალი ოთხწლიანი პროგრამა დაამტკიცა.

ბაჩო ახალაია, რომელიც 2009 წლიდან თავდაცვის მინისტრი იყო, შინაგან საქმეთა ახალი მინისტრი გახდა – ეს პოსტი თითქმის ბოლო შვიდი წლის განმავლობაში მერაბიშვილს ეკავა. ახალაია თავდაცვის მინისტრის პოსტზე განათლების მინისტრმა დიმიტრი შაშკინმა შეცვალა. პოლიციის აკადემიის ყოფილი რექტორი ხატია დეკანოიძე, რომელიც სულ ცოტა ხნის წინ გამოცდების ეროვნულ ცენტრს ჩაუდგა სათავეში, განათლების მინისტრი გახდა. დალი ხომერიკმა, რომელსაც დევნილობაში მყოფ აფხაზეთის მთავრობაში განათლების მინისტრის თანამდებობა ეკავა, ოკუპირებული ტერიტორიებიდან იძულებით გადაადგილებულ პირთა, ლტოლვილთა და განსახლების მინისტრის პოსტზე კობა სუბელიანი შეცვალა.

მთავრობაში, ასევე, გაჩნდა ერთი ახალი უპორტფელო მინისტრის თანამდებობა – დასაქმების საკითხებში სახელმწიფო მინისტრი. ეს ახალი პოსტი პაატა ტრაპაიძემ, სამშენებლო კომპანია „კავკასუს როუდ პროჯექტის“ დირექტორმა, დაიკავა.

დანარჩენმა მინისტრებს ცვლილებები არ შეხებია. აი ისინიც:

სახელწმიფო მინისტრი ევროპულ და ევროატლანტიკურ სტრუქტურებში ინტეგრაციის საკითხებში, ვიცე-პრემიერი – გიორგი ბარამიძე;

სახელმწიფო მინისტრი რეინტეგრაციის საკითხებში, ვიცე-პრემიერი – ეკატერინე ტყეშელაშვილი;

იუსტიციის მინისტრი – ზურაბ ადეიშვილი;

საგარეო საქმეთა მინისტრი – გრიგოლ ვაშაძე;

ფინანსთა მინისტრი – დიმიტრი გვინდაძე;

ენერგეტიკისა და ბუნებრივი რესურსების მინისტრი – ალექსანდრე ხეთაგური;

ეკონომიკის და მდგრადი განვითარების მინისტრი – ვერა ქობალია;

გარემოს დაცვის მინისტრი – გიორგი ხაჩიძე;

სოფლის მეურნეობის მინისტრი – ზაზა გოროზია;

სასჯელაღსრულების, პრობაციისა და იურიდიული დახმარების საკითხთა მინისტრი – ხათუნა კალმახელიძე;

კულტურისა და ძეგლთა დაცვის მინისტრი – ნიკოლოზ რურუა;

რეგიონული განვითარებისა და ინფრასტრუქტურის მინისტრი – რამაზ ნიკოლაიშვილი;

სპორტისა და ახალგაზრდობის საქმეთა მინისტრი – ლადო ვარძელაშვილი;

სახელმწიფო მინისტრი დიასპორის საკითხებში – მირზა დავითაია.

გუშინ დეპუტატების წინაშე გამოსვლისას ახალმა პრემიერ-მინისტრმა ვანო მერაბიშვილმა კიდევ ერთხელ გაიმეორა, რომ ის დარწმუნებულია, რომ ახალი შინაგან საქმეთა მინისტრი ბაჩო ახალაია სწორი კანდიდატურაა ამ პოსტისთვის.

„მე დარწმუნებული ვარ, რომ ბაჩო დაამტკიცებს, რომ პოლიციაში ჩატარებული რეფორმა – ეს არის უკვე მტკიცე პოლიცია, რომ საკადრო ცვლილება, მინისტრის ცვლილება არაფერს არ შეცვლის, – განაცხადა მერაბიშვილმა. – მე დარწმუნებული ვარ, რომ ქართული პოლიცია კვლავაც იქნება ერთ-ერთი მთავარი დასაყრდენი საქართველოში რეფორმების განხორციელების, ასევე, საქართველოს სტაბილურობისა და საქართველოს განვითარების“.

შინაგან საქმეთა სამინისტროს მაღალ ეშელონებში უკვე განხორციელდა ერთი ცვლილება – საინფორმაციო და ანალიტიკური დეპარტამენტის ხელმძღვანელმა შოთა უტიაშვილმა თანამდებობა დატოვა. უტიაშვილმა ამ ეტაპზე თავი შეიკავა თავის მომავალ საქმიანობაზე საუბრისგან, მაგრამ, სავარაუდოდ, ის პრემიერ-მინისტრ მერაბიშვილთან გააგრძელებს მუშაობას, თუმცა მისი ახალი თანამდებობის შესახებ განცხადება ჯერ არ გაკეთებულა.

პარლამენტმა, ასევე, დაამტკიცა განახლებული მთავრობის ახალი ოთხწლიანი პროგრამა „მეტი სარგებელი ხალხს“.

პარლამენტის ნდობის მოპოვებამდე დეპუტატების წინაშე გამოსვლისას მერაბიშვილმა ახალი ოთხწლიანი, 20-მილიარდიანი პროგრამის ძირითადი პუნქტები წარადგინა, რომელიც ითვალისწინებს 6 მილიარდი ლარის გამოყოფას მომდევნო ოთხი წლის განმავლობაში გაზრდილი პენსიების დაფინანსებისთვის; 3 მილიარდი ლარის გამოყოფას მომდევნო ოთხი წლის განმავლობაში ჯანმრთელობის დაზღვევისთვის; 3 მილიარდ ლარს სოციალური დახმარების პროგრამებისთვის; 4 მილიარდ ლარს სოფლის მეურნეობისა და 4 მილიარდ ლარს განათლების სფეროსთვის, ასევე, მომდევნო ოთხი წლის განმავლობაში.

წელს 1 მილირდ ლარზე ოდნავ მეტია გამოყოფილი პენსიებისთვის; ამას ემატება 168.5 მილიონი ლარი ჯანმრთელობის დაზღვევისთვის.

მთავრობის დაპირება იმას ნიშნავს, რომ პენსიების წლიური დაფინანსება მომავალი წლიდან 1.5 მილიარდ ლარამდე უნდა გაიზარდოს, ხოლო ჯანმრთელობის დაზღვევის წლიური დაფინანსება – 750 მილიონ ლარამდე.

მერაბიშვილმა განაცხადა 3 ივლისს, რომ მისი მთავრობა დამატებითი სახსრების გამოყოფას აპირებს გაზრდილი საბიუჯეტო შემოსავლებიდან. მისი თქმით, იგი ელის, რომ საქართველოს ოთხწლიანი სახელმწიფო ბიუჯეტი, სულ ცოტა, 37-38 მილიარდ ლარს მიაღწევს – რაც საშუალოდ, სულ ცოტა, 9.25 მილიარდი ლარია ყოველწლიურად. 2012 წლის საბიუჯეტო ხარჯები 6.782 მილიარდ ლარს შეადგენს.

ახალი მთავრობის ერთ-ერთი დაპირებაა მომავალი წლიდან თითოეული ოჯახისთვის 1000-ლარიანი ვაუჩერის გადაცემა, რომელიც ოთხ წელიწადზეა გაწერილი.

შეგახსენებთ: 2012 წლის თებერვალში მთავრობამ 20-ლარიანი ენერგოვაუჩერები გამოყო თითოეული ოჯახისთვის. მაშინ მთავრობამ განაცხადა, რომ ვაუჩერები სულ ქვეყნის მასშტაბით 1,2 მილიონ ოჯახს დაურიგდა.

ოჯახების ეს რაოდენობა იმას ნიშნავს, რომ თუ მთავრობა 1000-ლარიანი ვაუჩერის შესახებ პირობას შეასრულებს, სახელმწიფო ბიუჯეტს ამ მიზნით 1.2 მილიარდი ლარის გამოყოფა მოუწევს მომდევნო ოთხი წლის განმავლობაში. მთავრობის ახალი პროგრამა, რომელიც პარლამენტმა 4 ივლისს დაამტკიცა, არ შეიცავს დეტალურ სქემას, რომლის ფარგლებშიც მერაბიშვილის მთავრობა ოჯახებისთვის ამ თანხის გამოყოფას გეგმავს.

„ქრისტიან-დემოკრატიული მოძრაობის“ ლიდერმა გიორგი თარგამაძემ განახლებული მთავრობა და მისი ახალი პროგრამა გააკრიტიკა და არჩევნების წინ პოპულიზმში დასდო ბრალი. მისი თქმით, განახლებული მთავრობა, ფაქტობრივად, „ნაციონალური მოძრაობის“ საარჩევნო შტაბს წარმოადგენს და არა პასუხისმგებელობით აღსავსე მთავრობას. მან, ასევე, გააკრიტიკა ახალი პრემიერ-მინისტრი იმის გამო, რომ მან თავის გამოსვლაში ერთხელაც არ ახსენა ქვეყნისთვის ყველაზე მტკივნეული საკითხი – ტერიტორიული მთლიანობა.

მერაბიშვილმა თავის გამოსვლაში განაცხადა, რომ ის მინისტრების მუშაობას შეაფასებს არა სტატისტიკურ მონაცემებზე დაყრდნობით, არამედ საზოგადოების დამოკიდებულებით ამა თუ იმ სამინისტროს მიმართ.