თბილისი, 3 ივლისი, საქინფორმი. დედაქალაქში სამარშრუტო ტაქსების შემოყვანისა და ახალი მანქანებით ხაზების დაკომპლექტების პროცესი დასრულდა. როგორც თბილისის მერიიდან იტყობინებიან, თბილისელების გადაადგილებაზე 2464 ახალი  ყვითელი ფერის სამარშრუტო ტაქსი იმუშავებს. ახალი, 2011 წელს  გამოშვებულ  „ფორდის“ მარკის ყვითელი მანქანები კომფორტულია, აღჭურვილია კონდიცირების თანამედროვე სისტემით და უზრუნველყოფს თითოეული მგზავრის სრულიად უსაფრთხო გადაადგილებას.

„კომპანია „თბილისის მიკროავტობუსმა“ აღებული ვალდებულება სრულად შეასრულა და მანქანების ჩამოყვანის პარალელურად, საკუთარი სურვილის გათვალისწინებით, სამუშაო ადგილები შეუნარჩუნდა ყველა იმ მძღოლს, რომლებიც ადრე ძველ მანქანებზე მუშობდნენ. აღნიშნულ სფეროში ამჟამად 4 500-ზე მეტი ადამიანია დასაქმებული“, – აცხადებენ  თბილისის მერიაში.

ახალ მიკროავტობუსებში მგზავრობის საფასურის გადახდა ტრადიციულთან ერთად თანამედროვე საბარათე სისტემითაც არის შესაძლებელი. მანქანებში დამონტაჟდა შესაბამისი აპარატურა და ნებისმიერ მსურველს შესაძლებლობა აქვს, მგზავრობის ღირებულება იმავე ელექტრონული ბარათით გადაიხადოს, რომლითაც მუნიციპალურ ტრანსპორტში – მეტროში, ავტობუსსა და საბაგიროში, სარგებლობს.

სამარშრუტო ტაქსებში  შეღავათით სარგებლობს  სოციალურად დაუცველი მოსახლეობა და ისინი მგზავრობის ღირებულების ნახევარს იხდიან, მეორე ნახევარს სრულად თბილისის მერია ანაზღაურებს. მერიის ცნობით, მნიშვნელოვანია, რომ ახალი მიკროავტობუსები სამუშაო დროის დასრულების შემდეგ კომპანია „თბილისის მიკროავტობუსის“ კუთვნილ ავტოსადგომზე ჩერდება.

მერიის ინფორმაციით, ყოველდღიურად თითოეული მანქანა ავტოსადგომის სამრეცხაოში ირეცხება, ტექნიკურ დათვალიერებას გადის და მხოლოდ ამის შემდეგ ემსახურება მოსახლეობას. ზაფხულის პერიოში, მოსახლეობისთვის კომფორტის შეთავაზების მიზნით, 1 ივლისიდან სამარშრუტო ტაქსებში სავალდებულო გახდა კონდიცირების სისტემის ჩართვა, რაც კომპანიის მიერ მკაცრად კონტროლდება.