თბილისი, 28 ივნისი, საქინფორმი. გუშინ თბილისის საქალაქო სასამართლომ, გაიზიარა რა კონტროლის პალატის გადაწყვეტილება, კოალიცია „ქართულ ოცნებაში“ შემავალი ექვსი პარტია და საზოგადოებრივი მოძრაობა „ქართული ოცნება“ სამართალდამრღვევად ცნო და ჯარიმის სახით კიდევ 2.38 მლნ ლარის გადახდა დააკისრა.

ეს თანხა ორჯერ უფრო მეტია, ვიდრე მთლიანი შემოწირულობები, რომლებიც კოალიციაში შემავალმა პარტიებმა პირველი ექვსი თვის განმავლობაში მიიღეს.

ჯარიმის გარდა, პარტიების შესახებ კანონის იმ მუხლის მიხედვით, რომლითაც კონტროლის პალატამ სანქცია დააკისრა, კოალიციას მოუწევს ბიუჯეტში 476 614 ლარის გადარიცხვაც – თანხა, რომელიც კომპანია „მენეჯმენტ სერვისის“ მიერ კოალიციის ოფისების დაქირავებისა და სარემონტო სამუშაოებისთვის უკანონო არაფინანსურ შემოწირულობად იქნა მიჩნეული კონტროლის პალატის მიერ. სწორედ ამ თანხის ხუთმაგი ოდენობა –  2.38 მლნ ლარი – დააკისრა სასამართლომ გუშინდელი გადაწყვეტილებით კოალიციას, ხოლო მანამდე – კომპანია „მენეჯმენტ სერვისს“.

კონტროლის პალატისა და სასამართლოს მიერ სამართალდამრღვევებად მიჩნეულნი არიან კოალიცია „ქართულ ოცნებაში“  შემავალ პარტიები: „რესპუბლიკური პარტია“, „ეროვნული ფორუმი“, „ჩვენი საქართველო – თავისუფალი დემოკრატები“,  „ქართული ოცნება – დემოკრატიული საქართველო“, „კონსერვატორული პარტია“ და „მრეწველობა გადაარჩენს საქართველოს“; საზოგადოებრივი მოძრაობა „ქართული ოცნება“.

„პოლიტიკურ პარტიებს არ აქვთ ასეთი ფულადი სახსრები. აქედან გამომდინარე, მათ ანგარიშებს, ალბათ, ყადაღა დაედება. ამით პოლიტიკური პარტიების საქმიანობა, ფაქტობრივად, შეუძლებელი გახდება“, – განაცხადა ივანიშვილის ერთ-ერთმა ადვოკატმა ალექსანდრე ბარამიძემ სასამართლო სხდომის დასრულების შემდეგ.

მან, ასევე, განაცხადა, რომ სასამართლომ დადგენილად მიიჩნია ის ფაქტები, რომლებიც მას თავად არ გამოუკვლევია და დაეყრდნო სხვა სასამართლო გადაწყვეტილებას, რომლის მხარეებს დაჯარიმებული პარტიების ნაწილი საერთოდ არ წარმოადგენდნენ.

„ეს არის სამართლის ერთ-ერთი ფუნდამენტური პრინციპის დარღვევა, რომლის თანახმად, არ შეიძლება პირს დაეკისროს რაიმე სანქცია ისეთი თითქოსდა ფაქტების გამო, რომლებიც მისი მონაწილეობით არ გამოკვლეულა სასამართლოზე“, – განაცხადა ბარამიძემ, რომელმაც აღნიშნა, რომ მიღებულ გადაწყვეტილებას სააპელაციო სასამართლოში გაასაჩივრებენ, თუმცა დასძინა, რომ ეს უფრო უშედეგო „ფორმალობა“ იქნება.

პარტიების დაჯარიმების შესახებ კონტროლის პალატის მიერ მიღებულ გადაწყვეტილებაზე საუბრისას, „თავისუფალი დემოკრატების“ ლიდერმა ირაკლი ალასანიამ, რომლის პარტიაც დაჯარიმებულებს შორისაა, ამ ქმედებას „პოლიტიკური რეპრესიის აქტი“ უწოდა, რაც, მისი თქმით, არის „პირდაპირი მცდელობა, რომ არაკონკურენტული არჩევნები ჩატარდეს“.

მისი თქმით, თუკი ხელისუფლება ამ პროცესებს მისივე ლოგიკით ბოლომდე გაჰყვება, მაშინ „ამ უკანონობით სასამართლომ უნდა გამოიტანოს დასკვნა, რომ დისკვალიფიკაცია გაუკეთოს ჩვენს პარტიებს“.