თბილისი, 27 ივნისი, საქინფორმი. იუნესკოს ნუსხაში მყოფი ქართული ძეგლების მდგომარეობის შესაფასებლად საერთაშორისო ექსპერტების ჯგუფი საქართველოში სექტემბერში ჩამოვა. ამის შესახებ კულტურული მემკვიდრეობის დაცვის ეროვნული სააგენტოს ხელმძღვანელმა ნიკოლოზ ვაჩეიშვილმა სანკტ-პეტერბურგიდან სატელეფონო ჩართვისას განაცხადა. მისივე თქმით, სანკტ-პეტერბურგში გამართულ იუნესკოს კომიტეტის სხდომაზე ბაგრატის ტაძართან დაკავშირებით შეჯერებული ანგარიში გერმანიის მხარემ წარადგინა. სხდომაზე მიიღეს გადაწყვეტილება, ბაგრატის ტაძრის საკითხის განხილვა კომიტეტის მომავალი სხდომისთვის – 2013 წლისთვის გადაიდოს.

„კომიტეტი ამ საკითხის განხილვის გადადებას დაეთანხმა, რათა ცალმხრივობა გამორიცხულიყო. ჩვენ გვაქვს გრაფიკი, რომლითაც მსოფლიოს წამყვან ექსპერტებთან ერთად გავივლით შეფასების ყველა ფაზას. ამის შემდეგ დაზუსტდება კრიტერიუმები, სამომავლო სტრატეგია და ბაგრატის ტაძრის ნომინაციის საზღვრები“, – აღნიშნა სააგენტოს ხელმძღვანელმა.

მისივე თქმით, საერთაშორისო ექსპერტები საქართველოში სექტემბერში ჩამოვლენ და პირველ რიგში ბაგრატისა და გელათის, ასევე, მცხეთის საკითხებს და იქ განხორციელებულ სამუშაოებს შეაფასებენ.

ნიკა ვაჩეიშვილმა, ასევე, აღნიშნა, რომ ბაგრატის ტაძარსა და გელათის მონასტერს იუნესკოს ძეგლების ნუსხაში საზღვრების შემცირება არ ემუქრება, ანუ ბაგრატის ტაძარი საზღვრების შემცირების ხარჯზე ნუსხიდან არ ამოვარდება. მან მადლობა გადაუხადა იუნესკოსა და ძეგლთა დაცვის სხვა საერთაშორისო ორგანიზაციებს, რომ მათთან თანამშრომლობაზე მზად არიან.