თბილისი, 15 ივნისი, საქინფორმი. აშშ-ის ელჩმა საქართველოში ჯონ ბასმა განაცხადა, რომ თბილისსა და თეირანს შორის არსებული ურთიერთობები აშშ-სა და საქართველოს შორის მიმდინარე დიალოგის განსახილველი საკითხია, რომლის ფარგლებშიც გათვალისწინებულია ის მოცემულობა, რომ ირანი და საქართველო ერთ სამეზობლოს წარმოადგენენ.

ვაშინგტონში ატლანტიკურ საბჭოში გამოსვლისას ჯონ ბასმა განაცხადა, რომ კარგია, როცა თბილისი ირანელებს უვიზო რეჟიმით სარგებლობის შესაძლებლობას აძლევს, რათა ისინი ესტუმრონ საქართველოს და ნახონ, რა ხდება მეზობელ დემოკრატიულ სახელმწიფოში. თუმცა მან იქვე დასძინა, რომ ვაშინგტონს არ სურს, რომ თუნდაც უნებლიეთ საქართველო გახდეს ის ადგილი, სადაც საერთაშორისო სანქციების ქვეშ მყოფი ირანული კომპანიები ამ სანქციებისთვის თავის არიდებას შეძლებენ.

„ეს, რა თქმა უნდა, ორ (აშშ-სა და საქართველოს, – საქინფორმი) მთავრობას შორის არსებული განხილვების თემაა სხვადასხვა დონეზე“, – განაცხადა ბასმა, როდესაც მას ქართულ-ირანული ურთიერთობების შესახებ ჰკითხეს.

„მე ვიტყოდი, რომ ეს ხდება იმ გაგების კონტექსტში, რომ საქართველო სამხრეთ კავკასიაში მდებარეობს, ირანი მეზობელია და საჭიროა, რომ ორ ქვეყანას შორის ურთიერთობა არსებობდეს, როგორც ეს ნებისმიერ სამეზობლოში ხდება, და იმ სახით, როგორც საქართველო სთავაზობს ირანელებს შესაძლებლობას, რომ გამოვიდნენ ირანიდან და ნახონ, რა ხდება სამეზობლოში და ნახონ, რა ხდება მეზობელ დემოკრატიულ სახელმწიფოში, ეს კარგია“, – განაცხადა აშშ-ის ელჩმა.