თბილისი, 13 ივნისი, საქინფორმი. ომბუდსმენმა გიორგი ტუღუშმა საქართველოს მთავარ პროკურატურას მიმართა და იმერეთის, რაჭა-ლეჩხუმისა და ქვემო სვანეთის დროებითი დაკავების იზოლატორში პატიმრებთან არასათანადო მოპყრობის ფაქტების გამოძიებისკენ  მოუწოდა. კონკრეტულად, საქმე ეხება სამ მოქალაქეს – მანუჩარ ახვლედიანს, ირაკლი ჩანტლაძესა და ირაკლი დუნდუას, რომლებიც 27 მაისს ქუთაისში საგზაო მოძრაობის წესების დარღვევისა და პოლიციის შეურაცხყოფისთვის დააკავეს და ამჟამად ადმინისტრაციულ სასჯელს იხდიან.

ომბუდსმენის წარმომადგენლებმა პატიმრები იზოლატორში მოინახულეს და დარწმუნდნენ, რომ მათ „არასათანადოდ“ ეპყრობიან. თავად პატიმრები ახსნა-განმარტებით ბარათებში წერენ, რომ იზოლატორის თანამშრომლები მათ სიტყვიერ შეურაცხყოფას აყენებენ, საკნის კარზე აკაკუნებენ და ძილის საშუალებას არ აძლევენ, ირონიულად ეკიდებიან მათ მოთხოვნას კანონით გათვალისწინებული საგნებისა და ნივთების მიწოდების თაობაზე. ყველა ამგვარ მოთხოვნას იზოლატორის თანამშრომლები დაცინვით პასუხობენ და პატიმრებს მათ პოლიტიკურ შეხედულებებს აყვედრიან – ამ ყველაფრის კონსტატაციას სახალხო დამცველი პატიმრების ჩვენებებზე დაყრდნობით ახდენს.