აქტუალური
პირდაპირი უცხოური ინვესტიციები პირველ კვარტალში
თბილისი, 13 ივნისი, საქინფორმი. როგორც საქართველოს სტატისტიკის ეროვნული სამსახური საქინფორმს ატყობინებს, საქსტატის წინასწარი მონაცემების თანახმად, 2012 წლის პირველ კვარტალში პირდაპირი უცხოური ინვესტიციების მოცულობა, წინა წლის ანალოგიურ პერიოდთან შედარებით, 55 %-ით გაიზარდა და 269 მლნ აშშ დოლარი შეადგინა.
საქსტატის ინფორმაციით, 2012 წლის პირველ კვარტალში პირდაპირი უცხოური ინვესტიციების დიდი ნაწილი გერმანიიდან შემოვიდა – 131.1 მლნ აშშ დოლარი; შემდეგ მოდის თურქეთი – 32.3 მლნ აშშ დოლარი; გაერთიანებული სამეფო – 27.3 მლნ აშშ დოლარი; ბრიტანეთის ვირჯინიის კუნძულები – 21.7 მლნ აშშ დოლარი; იაპონია – 21.6 მლნ აშშ დოლარი; ლუქსემბურგი – 19.8 მლნ აშშ დოლარი.
2012 წლის პირველ კვარტალში გადამამუშავებელმა მრეწველობამ და საფინანსო სექტორმა პირდაპირი უცხოური ინვესტიციების ყველაზე დიდი ნაწილი მოიზიდა, შესაბამისად – 64.5 მლნ აშშ დოლარი და 62.5 მლნ აშშ დოლარი. შემდეგ მოდის: ტრანსპორტი და კავშირგაბმულობა – 38.1 მლნ აშშ დოლარი; უძრავი ქონება – 20.9 მლნ აშშ დოლარი; სამთომოპოვებითი მრეწველობა – 19.5 მლნ დოლარი; ენერგეტიკა – 18.3 მლნ აშშ დოლარი; სოფლის მეურნეობა – 5.6 მლნ აშშ დოლარი; რესტორნები და სასტუმროები – 4.4 მლნ აშშ დოლარი.
