თბილისი, 11 ივნისი, საქინფორმი. „რუსეთში ქართველთა კავშირის“ პრეზიდენტი მიხეილ ხუბუტია ეროვნებათაშორისი ურთიერთობების საბჭოს შემადგენლობაში შევიდა, რომელსაც სათავეში რფ-ის პრეზიდენტი ვლადიმერ პუტინი ჩაუდგა. თანახმად ბრძანებულებისა „რუსეთის ფედერაციის პრეზიდენტთან არსებული ეროვნებათაშორისი საკითხების საბჭოს შესახებ“, რომელიც რუსეთის პრეზიდენტის საიტზეა გამოქვეყნებული, საბჭო არის „რუსეთის ფედერაციის პრეზიდენტთან არსებული სათათბირო და საკონსულტაციო ორგანო, რომელიც შეიქმნა სახელმწიფო ხელისუფლების ფედერალური ორგანოების, რუსეთის ფედერაციის სუბიექტთა სახელმწიფო ხელისუფლების ორგანოების, ადგილობრივი თვითმმართველობის ორგანოების, საზოგადოებრივი ორგანიზაციების, სამეცნიერო და სხვა ორგანიზაციების ურთიერთქმედების უზრუნველყოფის მიზნით რუსეთის ფედერაციის სახელმწიფო ნაციონალური პოლიტიკის რეალიზაციასთან დაკავშირებული საკითხების განხილვისას“.

საბჭოს შემადგენლობაში შევიდნენ რუსეთის მთავრობის წევრები: განათლების მინისტრი დიმიტრი ლივანოვი, კულტურის მინისტრი ვლადიმირ მედინსკი, რეგიონული განვითარების მინისტრი ოლეგ გოვორუნი, ფედერალური მიგრაციული სამსახურის დირექტორი კონსტანტინე რომოდანოვსკი.

საბჭოში შევიდნენ, აგრეთვე, სომხური, ქართული, აზერბაიჯანული, კორეული, ლეკური, ჩუვაშური, ქურთული, პოლონური, ყაზახური, ებრაული, ბოშური, თათრული, უკრაინული, ბელარუსული ფედერალური ეროვნული დიასპორებისა და სხვა დიასპორული და საზოგადოებრივი ორგანიზაციების ლიდერები.