თბილისი, 8 ივნისი, საქინფორმი. საქართველოს კონტროლის პალატის ფინანსური მონიტორინგის სამსახურმა „ქართული ოცნების“ ლიდერი ბიძინა ივანიშვილი სამართალდარღვევის სუბიექტად ცნო და სამართალდარღვევის დოკუმენტები შესასწავლად სასამართლოს გადაუგზავნა.

აღნიშნულთან დაკავშირებით, კონტროლის პალატის განცხადებას უცვლელად გთავაზობთ:

„ფინანსური მონიტორინგის სამსახური აწარმოებდა პოლიტიკური კოალიცია „ქართული ოცნების“ მიერ კომპანიების – „ბურჯის“, „ელიტა ბურჯის“ და „გლობალ კონსალტინგ გრუპის“ – ტექნიკური, პერსონალური და სხვა საშუალებების, პოლიტიკური და საარჩევნო მიზნებისთვის გამოყენების საკითხის შესწავლას. საქმე ეხება ამომრჩევლებისათვის მასობრივად და უსასყიდლოდ ათეულობით ათასი სატელიტური ანტენის დარიგებისა და 239 ერთეული სხვადასხვა კლასის ავტომანქანით შეღავათიანი მომსახურების ფაქტებს.

მონიტორინგის პროცესში მოპოვებულ იქნა მტკიცებულებები (დოკუმენტური, ანალიტიკური, მოქალაქეთა გამოკითხვები და ა.შ.), რომლებიც ადასტურებს პოლიტიკური კოალიციის მიერ საარჩევნო და პოლიტიკური მიზნებისთვის ზემოაღნიშნული კომპანიების მომსახურების კანონსაწინააღმდეგო გამოყენების ფაქტებს, რაც განაპირობებს პოლიტიკური სუბიექტის მიერ კანონით აკრძალული ფინანსური უპირატესობის მიღებას, და რაც „მოქალაქეთა პოლიტიკური გაერთიანებების შესახებ“ ორგანული კანონით გათვალისწინებული სამართალდარღვევების შემადგენლობას ქმნის.

საქმეში არსებული მასალების საფუძველზე, სამართალდარღვევის სუბიექტად განისაზღვრა გაცხადებული პოლიტიკური და საარჩევნო მიზნების მქონე ფიზიკური პირი ბიძინა ივანიშვილი, რომლის მიერ მისი კუთვნილი კომპანიების მეშვეობით ხორციელდებოდა პოლიტიკური და საარჩევნო მოტივაციით კანონსაწინააღმდეგო სქემების დაფინანსება კანონით დადგენილი რეგულაციების გვერდის ავლის მიზნით.