თბილისი, 1 ივნისი, საქინფორმი. ქუთაისის მერია „ქართულ ოცნებას“ მიტინგისათვის ალტერნატიულ ადგილს სთავაზობს. კოალიციამ ქუთაისის მერიისაგან ითხოვა ნებართვა, რომ 7 ივნისს მიტინგი ჩატარდეს ცენტრალურ მოედანზე, სადაც ცოტა ხნის წინ ე.წ. კოლხური შადრევანი გაიხსნა. თუმცა ქუთაისის მერიაში განმარტეს, რომ ამ დღეს აღნიშნულ ტერიტორიაზე კონცერტია დაგეგმილი და ივნისის ერთი თვის პროგრამა მთლიანად გაწერილია.

მათივე თქმით, აღნიშნული ფესტივალი ჯერ კიდევ 25 მაისს ტელეკომპანია „რიონის“ ეთერით დააანონსეს. ქალაქის ცენტრში ერთი თვის განმავლობაში მუსიკალური და თეატრალური ფესტივალის ფარგლებში ყოველდღე, დილიდან საღამომდე, მოედანი დაკავებული ექნება სხვადასხვა ღონისძიებას.

როგორც ქუთაისის მერიის პრესსამსახურში აღნიშნეს, ქალაქის თვითმმართველობამ კოალიციას ალტერნატიული ადგილი აღმაშენებლის ძეგლთან, ბალახვნის მოედანზე, ე.წ. 100-საფეხურიან კიბეებთან შესთავაზა.