თბილისი, 31 მაისი, საქინფორმი. ევროპიდან დაბრუნებული კათოლიკოს-პატრიარქი აეროპორტიდან ტრადიციულად პირდაპირ სამების საკათედრო ტაძარში მივიდა. ტაძრის მოლოცვის შემდეგ კი შეკრებილ მრევლს მიმართა.

უწმიდესმა თავდაპირველად პარიზში ფონდ „იავნანას“ ორგანიზებით გამართულ საქველმოქმედო კონცერტზე გაამახვილა ყურადღება და აღნიშნა, რომ კონცერტს, სადაც წმიდა საგალობლებიც შესრულდა, ევროპის სხვადასხვა ქვეყნიდან ჩასული უამრავი ქართველი დაესწრო.

კათოლიკოს-პატრიარქის თქმით, მან მშვიდობით მოიარა ევროპის ქვეყნები და კიდევ ერთხელ დარწმუნდა, რომ მსოფლიოში არცერთი ქვეყანა და არცერთი კონტინენტი არ არის ისეთი ტკბილი, როგორიც საქართველოა და ამისთვის უფალს მადლობა უნდა შევწიროთ.

ილია მეორემ ყურადღება გაამახვილა, ასევე, მოახლოებულ წმინდა ნინოს დღესასწაულზე და აღნიშნა, რომ დღესასწაულის წინა საღამოს, 31 მაისს, ლოცვა გაიმართება სიონის ტაძარში, ხოლო 1 ივნისს საზეიმო წირვა-ლოცვა სამების საკათედრო ტაძარში ჩატარდება.