თბილისი, 22 მაისი, საქინფორმი. „ფორბსის“ რუსულ გამოცემაში გამოქვეყნდა ინტერვიუ კოალიცია „ქართული ოცნების“ ლიდერ ბიძინა ივანიშვილთან. ინტერვიუს ავტორი ჟურნალისტი რევაზ საყევარიშვილია, რომელიც „Forbes-Georgia“-ს ყოფილი მთავარი რედაქტორია.

შეგახსენებთ, რომ რევაზ საყევარიშვილმა „Forbes-Georgia“-ს მთავარი რედაქტორის თანამდებობა 27 მარტს პროტესტის ნიშნად დატოვა და რედაქტორობიდან წასვლის მიზეზად დამფუძნებლის მხრიდან სარედაქციო დამოუკიდებლობაში უხეში ჩარევა და ცენზურა დაასახელა. დამფუძნებელსა და მთავარ რედაქტორს შორის დაპირისპირების მიზეზი სწორედ ბიძინა ივანიშვილთან ჩაწერილი ინტერვიუ გახდა. „Forbes Georgia“-მ რევაზ საყევარიშვილი პლაგიატში დაადანაშაულა, თუმცა, ამის მიუხედავად, ივანიშვილთან შემოკლებული ინტერვიუ მაინც გამოაქვეყნა.