თბილისი, 18 მაისი, საქინფორმი. საქართველოს საპატრიარქო შეგვახსენებს, რომ თბილისში ვერცხლის ქუჩაზე მდებარე ეკლესია, რომელსაც სომხები სურბ ნშანს უწოდებენ, ხოლო ქართველები – წმინდა ნიკოლოზის სახელობის ეკლესიას, სადავო ეკლესიებს განეკუთვნება. „მომხდარი (13 მაისის ღამის კოკისპირული წვიმის შემდეგ ეკლესიის ნაწილის ჩამონგრევა) ჩვენთვისაც განსაკუთრებით მტკივნეულია”, – ნათქვამია საქართველოს საპატრიარქოს საგანგებო განცხადებაში. ტაძრის კუთვნილების საკითხის გარკვევამდე საპატრიარქოს აუცილებლად მიაჩნია მისი სასწრაფოდ გადარჩენა და ამ მიზნით საქართველოს მთავრობას  სთავაზობს, შეიქმნას შერეული სამუშაო ჯგუფი საქართველოს საპატრიარქოს, სომხეთის სამოციქულო ეკლესიისა და საქართველოს შესაბამისი უწყებების წარმომადგენლებისგან, რომელიც ძეგლის მდგომარეობას შეისწავლის და მისი კონსერვაციისა და რეაბილიტაციის სამუშაოთა გეგმას დასახავს.

„გვსურს, შევახსენოთ საზოგადოებას, რომ ინტერრელიგიური ჯგუფის სხდომაზე საქართველოს საპატრიარქომ ორჯერ დააყენა ახოსპირელის ქუჩაზე მდებარე ასეთივე სადავო ტაძრის გამაგრების საკითხი (ის 2009 წლის ბოლოს ჩამოინგრა), მაგრამ ჩვენთვის გაუგებარი მიზეზებით სომხურმა მხარემ ამ წინადადებაზე უარი თქვა. ჩვენ ვაცხადებდით და ახლაც ვაცხადებთ, რომ ასეთი ტაძრების კონფესიური კუთვნილების დადგენამდე აუცილებელია, სახელმწიფომ სასწრაფო ზომები მიიღოს მათი დაცვისა და გადარჩენისთვის“, – ნათქვამია განცხადებაში.