პოლიტიკა
საკონსტიტუციო ცვლილებების პროექტით საქართველოში ცხოვრების ცენზი 5 წლამდე შემცირდა

1cenz-prozhivaniaთბილისი, 16 მაისი, საქინფორმი. საკონსტიტუციო ცვლილებების პროექტით, რომელიც ბიძინა ივანიშვილის არჩევნებში მონაწილეობის უფლებას ეხება, საქართველოში ცხოვრების ცენზი 5 წლამდე შემცირდა. კონსტიტუციაში ცვლილებების პროექტი პარლამენტმა პირველივე მოსმენით მიიღო ადრინდელი ცენზის – 10 წლის ნაცვლად. კერძოდ, არჩევნებში მონაწილეობა საქართველოს მოქალაქეებთან ერთად, ასევე, შეეძლოთ ევროკავშირის წევრი ქვეყნის იმ მოქალაქეებს, რომლებიც დაბადებული არიან საქართველოში და ბოლო 10 წელი ცხოვრობდნენ ქვეყანაში. ამ ცვლილების მიღების შემდეგ გაირკვა, რომ ბიძინა ივანიშვილს საქართველოში ბოლო 10 წელი არ უცხოვრია და არჩევნებში მონაწილეობას ვერ შეძლებდა.

საპარლამენტო უმრავლესობამ კი ივანიშვილის განცხადების შემდეგ მზადყოფნა გამოთქვა, კონსტიტუციაში ცვლილების პროექტი იმგვარად შეეცვალათ, რომ ბიძინა ივანიშვილს არჩევნებში მონაწილეობის უფლებით ესარგებლა.

კონსტიტუციის ცვლილებების პროექტის საბოლოო ვარიანტი იურიდიულ საკითხთა კომიტეტის სხდომაზე გახდა ცნობილი. მასში ჩაიწერება: „2014 წლის პირველ იანვრამდე საპარლამენტო და საპრეზიდენტო არჩევნებში მონაწილეობისა და ხმის მიცემის უფლება საქართველოს მოქალაქეებთან ერთად შესაბამისი ასაკიდან ექნებათ, ასევე, პირებს, რომლებიც დაბადებული არიან და ბოლო 5 წელი მუდმივად ცხოვრობენ საქართველოში და აქვთ ევროკავშირის წევრი სახელმწიფოს მოქალაქეობა“.

საკონსტიტუციო ცვლილებების პროექტი მეორე მოსმენით პარლამენტის რიგგარეშე სხდომაზე იქნა განხილული.