თბილისი, 15 მაისი, საქინფორმი. ძალის გამოუყენებლობაზე რუსეთის მიერ შეთავაზებულ წინადადებაზე საქართველო პარტნიორებთან ერთად იმსჯელებს. ეს განცხადება ტრადიციულ ბრიფინგზე საქართველოს საგარეო საქმეთა მინისტრის მოადგილე ნინო კალანდაძემ გააკეთა.

იგი ჟენევის მოლაპარაკებების თანათავმჯდომარე ანტი ტურუნენის მიერ აფხაზეთში ვიზიტისას გაკეთებულ შემდეგ განცხადებას გამოეხმაურა: „რუსეთმა ძალის გამოუყენებლობის შესახებ დოკუმენტი შემოგვთავაზა. არის მონაცემები, რომ ქართული მხარე ამაზე თავის წინადადებებს ამზადებს. ჩვენ გვაქვს გარკვეული სიგნალები, რომ ერთობლივი დოკუმენტის მომზადებას შევძლებთ“.

ნინო კალანდაძის თქმით, ძალის გამოუყენებლობაზე შეთანხმება როგორც საქართველოს, ისე რუსეთის ვალდებულებაა. ამ საკითხზე მუშაობა დიდი ხანია, მიმდინარეობს.