თბილისი, 14 მაისი, საქინფორმი. აფხაზეთის უსაფრთხოების სამსახურები ამ ეტაპზე სიფრთხილით ეკიდებიან იმის მტკიცებას, რომ იარაღის სამალავები, რომლებიც რეგიონში აღმოაჩინეს, სოჭში 2014 წლის ოლიმპიური თამაშების წინ და მის განმავლობაში ტერორისტული აქტების განხორციელებისთვის იყო განკუთვნილი. ამის შესახებ  რუსული გაზეთი „კომერსანტი“ იტყობინება.

როგორც რუსეთმა განაცხადა 10 მაისს, აფხაზეთში ნაპოვნი დიდი რაოდენობით იარაღი და ტყვიაწამალი სოჭში დაგეგმილი ტერორისტული აქტებისთვის იყო განკუთვნილი და აღნიშნა, რომ იარაღი აფხაზეთში საქართველოს სპეცსამსახურებთან ახლო კავშირების მქონე ჩეჩენი მეამბოხეების ლიდერმა დოკუ უმაროვმა შეიტანა.

აფხაზეთის უშიშროების საბჭოს ანონიმურმა წყარომ განუცხადა გაზეთ „კომერსანტს“, რომ „ეს ვერსია მოწმდება და ჯერჯერობით შედეგებზე საუბარი ნაადრევია“.

იმავე წყაროზე დაყრდნობით „კომერსანტი“ იტყობინება, რომ იარაღის სამალავები გუდაუთის რაიონში იმ გამოძიების ფარგლებში იქნა აღმოჩენილი, რომელიც აფხაზეთის ლიდერ ალექსანდრე ანქვაბზე უკანასკნელ თავდასხმას უკავშირდება, როდესაც თებერვალში მის ესკორტს ცეცხლი გაუხსნეს და  რომლის დროსაც მისი დაცვის ორი წევრი დაიღუპა. ეს მეხუთე ან შესაძლოა, მეექვსე თავდასხმა იყო ანქვაბზე 2005 წლის შემდეგ.

„მაშინვე ნათელი გახდა, რომ თავდამსხმელები არა მხოლოდ კარგად შეიარაღებული იყვნენ, არამედ შესაბამისი მომზადებაც ჰქონდათ გავლილი – ისინი ძალიან კარგად მოქმედებდნენ; ფაქტობრივად, ნამდვილი ბრძოლა იყო ყუმბარმტყორცნების, ავტომატებისა და სხვა იარაღის გამოყენებით“, – იტყობინება გაზეთი რეგიონის უშიშროების საბჭოს წყაროზე დაყრდნობით.

აფხაზური ინფორმაციით, ერთ-ერთი სამალავი აფხაზეთის ადგილობრივი მკვიდრის სახლში იქნა აღმოჩენილი, რომელიც 4 მაისს დააკავეს და რომელსაც 2007 წელს ანქვაბზე თავდასხმის  მცდელობასთან კავშირში დასდეს ბრალი.  იმ დროს ანქვაბი რეგიონის პრემიერ-მინისტრი იყო.

რუსეთმა განაცხადა, რომ იარაღი აფხაზეთში დოკუ უმაროვის „კავკასიის საამიროს“ „აფხაზეთის ჯამაათის“ სახელწოდებით  ცნობილმა ადგილობრივმა ქსელმა დამალა.

რუსეთის ნაციონალურმა ანტიტერორისტულმა კომიტეტმა, ასევე, განაცხადა, რომ რუსეთის უშიშროების სამსახურები ამ დაჯგუფებას 2011 წლის აგვისტოდან იკვლევენ.

აფხაზეთის უშიშროების საბჭოს წყაროს განცხადებით, ეს პირველი შემთხვევაა, როდესაც აფხაზეთში გამოაშკარავებულ იქნა „ტერორისტული დაჯგუფება, რომელსაც აშკარად რადიკალური მუსულმანური ხასიათი აქვს“.

როგორც ჩანს, „აფხაზეთის ჯამაათის“ დაჯგუფების შესახებ განცხადება მოულოდნელი იყო აფხაზეთის ადგილობრივი მიმომხილველებისა და ექსპერტებისთვის.

სოხუმის გაზეთ „ჩეგემსკაია პრავდას“ რედაქტორმა ინალ ხაშიგმა რადიო „თავისუფლების“ რუსულენოვანი სამსახურ „ეხო კავკაზას“განუცხადა, რომ, მართალია, გარკვეული ხმები გავრცელდა ასეთი დაჯგუფების არსებობის შესახებ, მაგრამ „ზოგადად, ის არ ჩანს“. მისი თქმით, დაჯგუფების შესახებ განცხადება მოულოდნელი შემობრუნება იყო ანქვაბზე თავდასხმის გამოძიებაში. მან, ასევე, განაცხადა, რომ რადიკალური ისლამისტური დაჯგუფება უჩვეულო რამ არის აფხაზეთისთვის. მისი თქმით, მართალია, შეუძლებელია ამგვარი დაჯგუფების არსებობის სრულად გამორიცხვა, მაგრამ არ ფიქრობს, რომ ბევრი ასეთი ადამიანი იყოს აფხაზეთში.

წარსულში აფხაზეთში ადგილობრივი მუსულმანური თემის წარმომადგენლებზე თავდასხმის რამდენიმე  შემთხვევას ჰქონდა  ადგილი.

რუსლან გიცბა, რომელიც აფხაზეთში იარაღის სამალავთან დაკავშირებით დააპატიმრეს და რომელიც „აფხაზეთის ჯამაათის“ ლიდერად მოიაზრება,  გუდაუთის მეჩეთის 2007 წლის აგვისტოში მოკლული იმამის ხამზათ გიცბას ძმაა.

გიცბა ქართული ძალების წინააღმდეგ იბრძოდა აფხაზეთში 90-იანი წლების დასაწყისში ჩეჩენი საველე მეთაურ შამილ ბასაევის მეთაურობით. ის იმ გამტაცებლებს შორის იყო, რომელთაც 1996 წლის იანვარში ორთქლმავალი „ავრაზია“ დაიკავეს თურქეთის პორტ ტრაბზონში, რათა ჩეჩენი აჯანყებულებისთვის მხარდაჭერა გამოეხატათ. გავრცელებული ინფორმაციით, გიცბა აფხაზეთში 2000 წელს დაბრუნდა მას შემდეგ, რაც თურქეთში სასჯელი მოიხადა და მუსულმანთა სასულიერო პირი გახდა. ხამზათ გიცბას მკვლელობის დროს გაზეთი „კომერსანტი” წერდა, რომ გიცბას აფხაზეთის ხელისუფლება არ სწყალობდა, რადგანაც შიშობდა, რომ ის ვაჰაბიზმის იდეოლოგიას ქადაგებდა.

ხამზათ გიცბას მკვლელობას ექვსიოდე კვირით ადრე წინ უძღოდა აფხაზეთის მაშინდელ პრემიერ ალექსანდრე ანქვაბზე თავდასხმა გუდაუთასა და სოხუმს შორის გზაზე (2007 წლის 9 ივლისს).

2010 წლის ივლისში სოხუმის მეჩეთის იმამმა განაცხადა, რომ იგი სიკვდილს გადაურჩა თავის მანქანაში ასაფეთქებელი მოწყობილობის აღმოჩენისას.

რამდენიმე დღის შემდეგ, 2010 წლის ივლისში, აფხაზეთის მუსლიმთა სასულიერო საბჭოს წევრი ემიკ ჩაკმაჩ-ოღლი გაგრაში საკუთარ სახლში მოკლეს.

ერთი ადამიანი დაიღუპა და კიდევ ორი დაიჭრა მას შემდეგ, რაც 2010 წლის ოქტომბერში გუდაუთის ცენტრში მდებარე მეჩეთის წინ მლოცველთა ჯგუფს უცნობმა შეიარაღებულმა პირებმა ცეცხლი გაუხსნეს. ერთ-ერთი დაჭრილი რუსლან გიცბა იყო, რომელიც ამჟამად იარაღის სამალავთან დაკავშირებით არის დაპატიმრებული.